Անտվերպենի համաշխարհային ադամանդի կենտրոնը (AWDC) պաշտոնապես հաստատել է ԱՄՆ նախագահ Դոնալդ Թրամփին բացառիկ նվեր հանձնելու փաստը։ Միացյալ Նահանգների անկախության 250-ամյակի առթիվ պատրաստված ոսկյա մատանին, որը զարդարված է 321 բնական ադամանդով և 75 այլ թանկարժեք քարերով, Բելգիայում ԱՄՆ դեսպան Բիլ Ուայթի միջոցով արդեն փոխանցվել է ամերիկյան կողմին։
Իրադարձության շուրջ հատուկ հայտարարությամբ է հանդես եկել AWDC-ի նախագահ Իսիդոր Մերսելը։
«Միացյալ Նահանգները բազմաթիվ սերունդների ընթացքում եղել են մեր կարևորագույն առևտրային գործընկերը։ Անտվերպենում վաճառվող բնական ադամանդների զգալի մասը ի վերջո հասնում է ամերիկացի ոսկերիչներին և սպառողներին։ Այս մատանիով մենք ցանկացել ենք ընդգծել այս ամուր տնտեսական հարաբերությունները», — նշել է կենտրոնի ղեկավարը։
Էկզիստենցիալ պայքար սինթետիկ քարերի դեմ
Կենտրոնի մամուլի ծառայությունը հավելյալ շեշտադրել է, որ մատանու պատրաստման ընթացքում օգտագործվել են բացառապես բնական ադամանդներ։ Ըստ AWDC-ի՝ թեև բնական և արհեստական (լաբորատոր) ադամանդները անզեն աչքով հնարավոր չէ տարբերել, սակայն դրանց ծագումը, եզակիությունը, շուկայական արժեքը և կարգավիճակը որակապես ամբողջությամբ տարբերվում են։
Այս ուղերձն ունի հստակ տնտեսական ենթատեքստ։ Անտվերպենի ադամանդի բիզնեսը, որը պատմականորեն պատկանում է տեղի հրեական համայնքին, վերջին տարիներին ծանր ճգնաժամ է ապրում ԱՄՆ-ում արտադրվող ավելի էժան սինթետիկ քարերի հետ սուր մրցակցության պատճառով։ Իրավիճակն էլ ավելի է բարդացել 2024 թվականից ուժի մեջ մտած ԵՄ պատժամիջոցների ֆոնին, որոնք արգելեցին ռուսական ադամանդների առևտուրը՝ հանգեցնելով Անտվերպենի շրջանառության կրճատմանը գրեթե 2 անգամ (10 միլիարդ եվրոյից հասնելով 6 միլիարդի)։
Փորձագետների կարծիքով՝ Իսիդոր Մերսելի այս պաշտոնական ժեստն ուղղված է Թրամփի վարչակազմի կողմից բնական ադամանդների շուկայի պաշտպանությանը և պրոտեկցիոնիստական հնարավոր լուծումների ակտիվացմանը։
