1. Իսրայելի Քնեսեթում կներկայացվի Հայոց ցեղասպանության ճանաչման բանաձևի նախագիծ
Իսրայելի արտաքին գործերի նախարար Գիդեոն Սաարը X-ի իր էջում հայտնել է, որ Քնեսեթի հաջորդ նիստում ներկայացվելու է Հայոց ցեղասպանությունը պաշտոնապես ճանաչող բանաձևի նախագիծ:
Մանրամասներ. Ըստ արտգործնախարարի՝ կառավարության հավանությանն արժանանալուց հետո նախագիծը կուղարկվի խորհրդարան՝ վերջնական հաստատման: «Օսմանյան կայսրության վերջին տարիներին հայ ժողովրդի դեմ իրագործված ցեղասպանության ճանաչումը բարոյական և պատմական պարտավորություն է»,- ընդգծել է նախարարը։
2. Վենեսուելայի ավերիչ երկրաշարժից զոհերի թիվը հասել է 235-ի. տուժել են նաև հայեր
Վենեսուելայում տեղի ունեցած հզոր երկրաշարժի հետևանքով զոհերի թիվն անցել է երկու հարյուրը. պաշտոնապես հաղորդվում է 235 զոհի, մոտ 4 հազար վիրավորի և 157 անհետ կորածի մասին։ Լա Գուայրա քաղաքի հիվանդանոցները ծանրաբեռնված են։
Հայ համայնքի վիճակը. Աղետի գոտում ավերվել են նաև հայ ընտանիքների տներ, կան տուժածներ։ Մեծի Տանն Կիլիկիո Կաթողիկոսությունից հայտնում են, որ Արամ Առաջին Վեհափառ Հայրապետն ուշադրությամբ հետևում է իրավիճակին և հայ համայնքի դժվարություններին։
3. Եվրախորհուրդը մինչև 2027 թվականի կեսերը երկարաձգեց ՌԴ դեմ պատժամիջոցները
Եվրոպական խորհուրդը որոշում է կայացրել Ռուսաստանի դեմ սահմանված տնտեսական պատժամիջոցների ժամկետը երկարաձգել մինչև 2027 թվականի հուլիսի 31-ը:
Սահմանափակումները. Պատժամիջոցները ներառում են ռուսական նավթի ծովային ներմուծման արգելքը, ֆինանսական, էներգետիկ և երկակի նշանակության ապրանքների առևտրի սահմանափակումները, ինչպես նաև ռուսական բանկերի, կրիպտոծառայությունների և ԵՄ-ում մի շարք պետական լրատվամիջոցների հեռարձակման արգելքները։
4. Ռուսաստանը հայտնել է ՀԱՊԿ բյուջեում Հայաստանի բաժնեմասի և չվճարումների մասին
ՀԱՊԿ-ում Ռուսաստանի մշտական ներկայացուցիչ Վիկտոր Վասիլևը հայտարարել է, որ Հայաստանի ֆինանսական ներդրումը կազմակերպության ընդհանուր բյուջեում կազմում է 10%:
Խնդիրը. Ռուս դիվանագետի փոխանցմամբ՝ հայկական կողմն արդեն երկու տարի է, ինչ չի վճարում սահմանված այդ գումարը։
5. ՍԴ-ն քննում է ընտրությունների արդյունքներն անվավեր ճանաչելու 7 քաղաքական ուժերի դիմումները
Սահմանադրական դատարանն այսօրվա նիստում անդրադառնում է խորհրդարանական ընտրությունների արդյունքները վիճարկող 7 քաղաքական միավորների հայցերին։
Բացակա դատավորներ. Կանխակալ վերաբերմունք ունենալու պատճառաբանությամբ նիստին չեն մասնակցում ՍԴ դատավորներ, իշխանական և մերձիշխանական ուժերի նախկին անդամներ Վլադիմիր Վարդանյանն ու Արտակ Զեյնալյանը: Ինչ վերաբերում է Սեդա Սաֆարյանի մասնակցության դեմ «Հայաստան» դաշինքի միջնորդությանը, այն քննության չի առնվել, քանի որ դատավորներից որևէ մեկը հարցը չի բարձրացրել։
6. «Ռոսսելխոզնադզորը» սահմանափակել է հայկական ևս երկու ձկնաբուծական ընկերությունների արտահանումը
Ռուսաստանն ընդլայնել է Հայաստանից ձկնամթերքի մատակարարման սահմանափակումները՝ կասեցնելով ևս երկու ձեռնարկությունների արտադրանքի սերտիֆիկացումը մինչև խախտումների վերացումը։
Համատեքստը. Գերատեսչությունից հիշեցրել են, որ նախկինում հայտնաբերված համակարգային խախտումների պատճառով հայկական կողմին խնդրել էին ժամանակավորապես դադարեցնել բոլոր ձկնամթերքների սերտիֆիկացումը, բացի անմիջական ստուգումներ անցած ընկերություններից։ Այժմ տարվում են աշխատանքներ անվտանգության ստանդարտների ապահովման ուղղությամբ։
7. Հայաստանում աճել է թմրամիջոցների հետ կապված հանցագործությունների բացահայտման ցուցանիշը
Ընթացիկ տարվա առաջին 5 ամիսների տվյալներով՝ Հայաստանում արձանագրվել է թմրամիջոցների ապօրինի շրջանառության 1313 դեպք:
Վիճակագրություն. Դեպքերի բացահայտման ցուցանիշն աճել է՝ նախորդ տարվա 50.9%-ի փոխարեն կազմելով 52.7%: Թմրամիջոցների ապօրինի շրջանառության հիմքով քրեական հետապնդում է հարուցվել 518 անձի նկատմամբ։ Միևնույն ժամանակ, մասնագիտացված կենտրոնում աճել է հաշվառված թմրամիջոց օգտագործող կանանց թիվը:
