Տեղական լուրեր
ՊԵԿ-ը պարզեցնում և հստակեցնում է մաքսային ստուգումների ընթացակարգերը
Մաքսային համակարգում ներդրվել են նոր կարգավորումներ՝ ուղղված վարչարարության թափանցիկությանն ու կանխատեսելիությանը։ Սահմանվել են ստուգումների հստակ ժամկետներ, ներդրվել է փաստաթղթերի էլեկտրոնային ծանուցման մեխանիզմ, ինչպես նաև վերանայվել են իրավախախտումների համար նախատեսված պատասխանատվության նորմերը։
Ճանապարհային տուգանքները roadpolice.am-ով վճարելիս կգործեն զեղչեր
Roadpolice.am կայքում էլեկտրոնային ծանուցումը միացնելու դեպքում քաղաքացիները կստանան տուգանքի գումարի 20% զեղչ։ Բացի այդ, եթե վճարումն իրականացվի ծանուցումը ստանալուց հետո 15 օրվա ընթացքում, կգործի ևս 30% լրացուցիչ նվազեցում։
Հայաստանը և ԱՄՆ-ը ստորագրել են արհեստական բանականության ոլորտում համագործակցության հռչակագիր
Վաշինգտոնում ստորագրված համատեղ հայտարարությունը նպատակ ունի խթանել ԱԲ ոլորտի զարգացումը։ Այն հիմնված է երեք առանցքային ուղղությունների վրա՝ նորարարությանը նպաստող կարգավորումներ, մատակարարման շղթաներում լայն համագործակցություն, ինչպես նաև մասնավոր հատվածի ու վենչուրային կապիտալի ներգրավում։
Ադրբեջանից Հայաստան է ներկրվել բենզինի և դիզվառելիքի հերթական խմբաքանակը
Հայաստան է արտահանվել 971 տոննա (18 վագոն) ավտոմոբիլային բենզին և 467 տոննա (8 վագոն) դիզելային վառելիք։ Բացի այդ, հունիսի 26-ի դրությամբ Ադրբեջանի տարածքով Ռուսաստանից Հայաստան տարանցիկ եղանակով փոխադրվել է ավելի քան 34 հազար տոննա հացահատիկ, մոտ 8 հազար տոննա պարարտանյութ և այլ ապրանքներ։
Հայաստանից ձկնամթերքի արտահանումը դեպի ՌԴ ամբողջությամբ դադարեցվել է
«Ռոսսելխոզնադզոր»-ը կասեցրել է ևս երկու հայկական ձեռնարկությունների արտադրանքի սերտիֆիկացումը, ինչի հետևանքով հայկական ձկնամթերքի մատակարարումները դեպի Ռուսաստան փաստացի լիովին կանգնել են։ Արտահանման վերականգնումը հնարավոր կլինի միայն արձանագրված խախտումների վերացումից հետո։
Միջազգային լուրեր
Apple-ը բարձրացրել է MacBook-ի և iPad-ի գները՝ չիպերի դեֆիցիտի պատճառով
ԱԲ տվյալների կենտրոնների ակտիվ կառուցմամբ պայմանավորված՝ շուկայում կտրուկ աճել է հիշողության չիպերի պահանջարկն ու արժեքը։ Սրա ֆոնին Apple-ը բարձրացրել է իր նոթբուքերի և պլանշետների գները, սակայն iPhone սմարթֆոնների գներն առայժմ կմնան անփոփոխ։
Հորմուզի նեղուցով անցնող նավերի ապահովագրությունը կրկնակի էժանացել է
Financial Times-ի փոխանցմամբ՝ մեկ շաբաթից էլ քիչ ժամանակահատվածում նեղուցով անցնող նավերի ապահովագրավճարները նվազել են մոտավորապես նավի արժեքի 5%-ից մինչև 2%։ Խոշոր տանկերների պարագայում սա թույլ է տալիս խնայել հարյուր հազարավոր դոլարներ։
2027 թվականին Ուկրաինայի բյուջեի դեֆիցիտը կհասնի ռեկորդային 2.04 տրլն գրիվնայի
Ուկրաինայի պետական ծախսերը 2027-ին նախատեսվում է հասցնել ռեկորդային 5.04 տրլն գրիվնայի։ Բյուջետային հսկայական ճեղքվածքը փակելու նպատակով երկրի իշխանություններն ակնկալում են գալիք տարում գործընկերներից ստանալ շուրջ 47.6 միլիարդ դոլարի արտաքին օգնություն։
Ռուսաստանը նոր օրենքով կանոնակարգում է կրիպտոարժույթների շուկան
ՌԴ ֆինանսների նախարարության պարզաբանմամբ՝ նոր օրենքը չի արգելում թվային ակտիվների օգտագործումը։ Դրա հիմնական նպատակը կրիպտոշուկան ստվերից դուրս բերելն է, ինչը թույլ կտա քաղաքացիներին և բիզնեսին գործարքներն իրականացնել ավելի անվտանգ ու օրինական դաշտում։
