Չնայած սմարթֆոններով և անհպում տեխնոլոգիաներով վճարումների լայն տարածմանը, Եվրոպական միությունում շրջանառության մեջ գտնվող թղթադրամների ծավալը շարունակում է ռեկորդային աճ գրանցել։ The Guardian պարբերականը, հղում անելով Եվրոպական կենտրոնական բանկի (ԵԿԲ) տվյալներին, հայտնում է, որ շրջանառության մեջ գտնվող կանխիկ միջոցների ընդհանուր արժեքը 2016 թվականի 1 տրիլիոն եվրոյից 2026 թվականին հասել է 1.6 տրիլիոն եվրոյի։
ԵԿԲ գլխավոր տնտեսագետ Ֆիլիպ Լեյնի փոխանցմամբ՝ ներկայում շրջանառության մեջ է գտնվում ավելի քան 31 միլիարդ թղթադրամ՝ համավարակից առաջ (2019թ.) գրանցված 24 միլիարդի համեմատ։ Ամենատարածված թղթադրամը 50 եվրոյանոցն է, որին հաջորդում է 100 եվրոյանոցը։
Կանխիկի պահանջարկի աճի հիմնական պատճառները․
Ճգնաժամային իրավիճակներ և բնական աղետներ․ Եվրոպայի շրջաններում բռնկված անտառային հրդեհները, ինչպես նաև հնարավոր արտակարգ իրավիճակները մեծացնում են ձեռքի տակ կանխիկ պաշար ունենալու անհրաժեշտությունը։
Կիբերսպառնալիքներ և պատերազմներ․ Անհպում վճարային համակարգերի և առցանց ծառայությունների հնարավոր խափանումների վերաբերյալ մտահոգությունները ստիպում են քաղաքացիներին ապահովագրել իրենց։
Պետական համապատասխան տնօրինումներ․ Ավստրիան, Ֆինլանդիան, Գերմանիան, Շվեդիան և Նիդեռլանդները քաղաքացիներին խորհուրդ են տալիս տանը պահել 70–100 եվրո կանխիկ գումար՝ 72 ժամվա ընթացքում առաջնային ապրանքներ գնելու համար, եթե թվային համակարգերը դադարեն գործել։
Եվրոպական կենտրոնական բանկը կանխիկ դրամը դիտարկում է որպես «ճգնաժամային իրավիճակներին ազգային պատրաստվածության» առանցքային բաղադրիչ։ Ֆինանսական կառույցն արձանագրում է յուրօրինակ պարադոքս․ առօրյա գնումների համար կանխիկի օգտագործումը գնալով նվազում է, սակայն որպես ապահովության միջոց թղթադրամներ պահող մարդկանց թիվը շարունակում է աճել։
