Մեկ տարվա ընթացքում Չինաստանի և Հայաստանի միջև փոխադարձ ապրանքաշրջանառությունն աճել է 22,5%-ով, կարծում եմ՝ սա լավ ցուցանիշ է։ Այս մասին դեկտեմբերի 17-ին լրագրողների հետ զրույցում հայտարարել է Հայաստանում Չինաստանի արտակարգ և լիազոր դեսպան Լի Սինվեյը:
Դիվանագետը 2025 թվականն անվանել է շատ խորհրդանշական տարի՝ հիշեցնելով, որ հենց այս տարի է նա նշանակվել Հայաստանում դեսպան։ «Ինձ համար մեծ պատիվ է մասնակցել մեր երկրների հարաբերությունները նոր մակարդակի բարձրացնելու աշխատանքներին», - նշել է դիվանագետը՝ նկատի ունենալով ռազմավարական գործընկերության հաստատման մասին փաստաթղթի ստորագրումը։
Դեսպանը հավելել է, որ Հայաստանը միացել է Ասիական ենթակառուցվածքային ներդրումների բանկին (AIIB), ինչը մեծ իրադարձություն է։ Լի Սինվեյը հայտնել է Չինաստանի պատրաստակամությունը՝ աջակցություն ցուցաբերել Հայաստանին այս գործընթացի շրջանակներում։ «Կարծում եմ՝ սա նույնպես լավ հիմք է երկու երկրների միջև հարաբերությունների հետագա զարգացման համար», - ընդգծել է դեսպանը։
Դիվանագիտական առաքելության ղեկավարը հավելել է, որ Չինաստանը և Հայաստանը հնագույն քաղաքակրթություններ են և երկու երկրներն էլ հազարամյակների հարուստ պատմություն ունեն։ «Փոփոխվող աշխարհում երկու երկրներն էլ ձգտում են զարգացման։ Համոզված եմ, որ Չինաստանի և Հայաստանի ժողովուրդները կկարողանան իրենց վրա զգալ երկու երկրների միջև համագործակցության արդյունքները», - եզրափակել է դիվանագետը։
